Penerbit Kiblat Buku Utama

Putri Citraresmi ngajerit maratan langit basa mireungeuh ramana geus ngababatang. Dirina sabil, méh teu kuat nahan diri, hayang kaluar ti kémahna. Tapi ari ras kana dirina nu kudu jadi upeti regog deui, bari tuluy nutupkeun lalangsé kémahna. Ret kana patrem paméré Paman Mangkubumi Bunisora ​​Suradipati, geus lamokot ku getih. Manéhna neuteup patrem bari mikiran nasibna. ”Getih…, enya getih! Enya, demi harga diri Nagri Sunda! Duh Rama Prabu..., duh ambu indung puntangan kaasih..., keur saha ngamalirkeun getih? Sakeclak memang keur kami, tapi ngocorna demi harga diri Nagri Sunda!....” Gabres patrem ditubleskeun ku dua leungeunna panceg niruk lempengan jajantungna.... Yosep Iskandar;   Edisi Kiblat Buku Utama, citakan I, 2016; 14,5 x 21 cm.; 88 kaca

Yoséph Iskandar   Kalayan tapis Yoséph Iskandar geus hasil ngahirupkeun deui pangalaman Wastu Kancana sanggeus ibu ramana sareng Citraresmi tiwas  di Palagan Bubat. Kalayan alpukah pamanna, Mangkubumi Bunisora Suradipati anu dijenengkeun jadi Ratu Sunda—nyuluran putra-makuta anu can sawawa, Wastu Kancana dikirim ka Mandala Binayapanti, pikeun digodog jadi satria utama jeung taméng nagara Sunda. Tapi waktu terangeun yén kulawargana geus ngemasi pati alatan ditipu ku Gajah Mada, Wastu Kancana murka sabab kuduna mah Nagri Sunda ngabéla kahormatan nagara males pulih ka Majapait. Sabalikna,  Bunisora Suradipati boga pamadegan yén kangaranan perang mah bakal nyangsarakeun rahayat jeung ngorbankeun nagara. Pamustunganana, saméméh nyanggupan diistrénan jadi Ratu Sunda, Wastu Kancana ngalalana pikeun nambahan luang jeung pangaweruh. Mimitina indit ka Pakuan Pajajaran, tuluy guguru di padépokan Susuk Lampung, nepi ka kataji ku nu geulis Déwi Sarkati. Citakan I, 2012; 14,5 x 21 ...

Yoséph Iskandar Prabu Wangisutah , roman sajarah nu ditulis dumasar kana naskah-naskah Pangéran Wangsakerta, terasna tina Wastu Kancana (Pusat Studi Sunda, 2012).  Sabada mulang ka Kawali, Wastu Kancana teu puruneun gancang-gancang diistrénan jadi papayung nagri, jeneng ratu jadi prabu. Sabab nurutkeun anggapanana jadi raja Sunda téh teu gampang. Kudu tanggoh dina wates bebeneran mun hayang raharja sapangeusi alam dunya. Waktu dicaritakeun ngeunaan hubunganana jeung putri Maharesi Susuk Lampung, Prabu Bunisora harita kenéh ngirimkeun utusan pikeun ngalamar Déwi Sarkati jadi praméswari. Hanjakal pasilingsingan, Déwi Sarkati geus indit ka Nagri Sunda nyusulan Wastu Kancana. Citakan I, 2012; 14,5 x 21 cm.; 108 kaca; Rp 27.000,-

Yoséph Iskandar Ajar Kutamangu nyaritakeun pangalaman Ajar Kutamangu adina Pamanahrasa di karajaan Talagamanggung, di wewengkon Talaga, salah sahiji kacamatan di Majaléngka ayeuna. Di ieu karajaan, Ajar Kutamangu mantuan Simbarkancana—putri raja Talagamanggung—numpes komplotan anu maéhan ramana. Singhoréng éta komplotan téh diluluguan ku carogé sang putri sorangan. Ajar Kutamangu téh salah sahiji novel tina ranggeuyan novel sajarah karya Yoséph Iskandar ngeunaan sajarah Karajaan Sunda anu ditulis dumasar kana Naskah-naskah Pangéran Wangsakerta . Citakan I, 2012; 14,5 x 21 cm.; 96 kaca; Rp 24.000,-

Yoséph Iskandar Tri Tangtu di Bumi mangrupa roman sajarah nu ngagambarkeun pangalaman Pamanah Rasa, putra Prabu Déwa Niskala ti Kawali, nu ngumbara ka kalér, nikah ka Nyi Ambetkasih tuluy ka Putri Subanglarang nu ngalahirkeun Walangsungsang, Larasantang, jeung Sangara nu ngagem agama Islam milu ka indung. Pamanah Rasa ogé dipulung mantu ku Prabu Susuktunggal di Pakuan. Malah waktu aya pakétrok paham antara mitoha jeung bapana, Pamanah Rasa nu geus diangkat jadi Prabu Anom di Pakuan, mihak ka mitoha, da cék anggapanana bapana ngalakukeun kasalahan. Inyana usaha satékah polah supaya pakétrokna éta dua raja téh teu nimbulkeun peperangan antara dua nagara nu asalna hiji, nyaéta Sunda. Salian ti éta, Pamanah Rasa nénjo aya bahaya nu jolna ti Demak nu geus Islam. Yoséph lain baé némbongkeun panemuna ngeunaan sajarah Sunda, tapi alus deuih dina ngagambarkeun tokoh-tokohna tur sacara tapis ngamangpaatkeun unsur-unsur carita pantun. Citakan I, 2011; 14,5 x 21 cm.; 92 kaca; Rp 22.000,-

Yoséph Iskandar Pamanahrasa nurut, bari usad-ésod, diukna ngésér ka pale­bah amparan gigireun Syéh Ahmad. Luk tungkul murungkut jiga kuuk. Santri-santri nu geus réngsé daharna, loba nu kalaluar ti jero masjid. Nu kamerekaan, gura-giru muru walungan. Di jero mas­jid katempo rada coréngcang. Nyai Subanglarang imeut nalingakeun lalaki anyar pinanggih nu diuk gigireun Syéh Ahmad. Sabot kitu, Pamanahrasa nyeng­katkeun tungkulna. Prok paadu teuteup jeung Nyai Subanglarang. Seblak! Aya nu nyeblak na angen-angen Nyai Subanglarang, bareng jeung nyeblakna Pamanahrasa. Citakan I, 2009; 14,5 x 21 cm.; 105 kaca; Rp 27.000,-

Yoséph Iskandar Pamanahrasa teu wani ngarérét-ngarérét acan ka pamajikanana. Dirina loba rasa rumasa. Rumasa lain jajaka. Rumasa geus boga pamajikan. Rumasa umurna pajauh jeung Nyai Putri Kentring Manik Mayang Sunda. Leuwih jauhna deui, rumasa teu pantes dirina nyandingkeun nu geulis kawanti-wanti, éndah­na kabina-bina. Antukna asa percaya asa henteu kana éta ka­jadian. Can gé palér ku karumasaanana, Prabu Susuk Tunggal ngabéwarakeun ka balaréa, yén Pamanahrasa poé éta kénéh dijenengkeun jadi Prabu Anom, kalawan jujulukna Prabu Anom Jayadéwata. Citakan I, 2009; 14,5 x 21 cm.; 95 kaca; Rp 24.000,-