Jadi dukun soténan kapaksa Si Kabayan mah. Saikem, pamajikanana, nu sasat jadi cukang lantaranna mah. Manéhna hayang males kanyeri ka salaki pédah kungsi ditampiling. Basa kadatangan sémah nu néangan dukun lepus, Saikem nyebutkeun yén Si Kabayan téh dukun anu kamatihanana moal aya bangsana. Ngan cenah ku lantaran jalma mahiwal, Si Kabayan tara daék ngaku jadi dukun kajaba mun ditampilingan heula.
Nya sanggeusna disiksa ku deungeun-deungeun bari jeung teu nyaho naon kasalahanana, Si Kabayan kapaksa daék dititah ngajiad Nyi Hasanah, anak sudagar, anu katarajang kasakit pireu barang rék dikawinkeun ku bapana. Ari saenyana mah Nyi Hasanah téh pipireuan. Manéhna teu suka dikawinkeun ka Haji Latip, da puguh geus pakait pikir jeung Agus. Agus nyamur jadi pangiring Embah Dukun, nepi ka bisa paamprok jeung bébénéna. Teu sakara-kara Nyi Hasanah bisa ngomong deui, ngan orokaya terus dibawa kabur ku Agus. Atuh puguh guyur.
Tah, kumaha ari geus kitu? Saé diaos baé. Matak pogot macana geura. Da sok sanajan rangkayna meunang mindahkeun tina naskah drama Le Medecin Malgre Lui karya Moliére (1622-1673) gé, ieu novél karya Mohamad Ambri (1892-1936) téh teu wudu karasa nyundana. Barina gé saha nu teu apal ka Mohamad Ambri, pangarang Sunda kawentar anu karangan-karanganana teu weléh dipikameumeut ku balaréa.
Citakan II, 2009; 14,5 x 21 cm.; 72 kaca; Rp 18.000,-
Komentar