Dian Héndrayana lahir di Subang, 25 Pébruari 1971. Mimiti kerep nulis sabada aktif di Kelompok Studi Budaya Sunda Rawayan, hiji komunitas diskusi di lingkungan Jurusan Basa jeung Sastra Sunda Unpad taun 90-an. Milu aktif dina widang seni tari jeung karawitan di Lingkung Seni Sunda (Lises) Unpad, sarta mimilu kana kagiatan téater. Dian gé aktif di Damas (Daya Mahasiswa Sunda) Cabang Kota Bandung sarta kungsi jadi pupuhuna période 1996-1998. Ti dinya tuluy aktif di Damas Tingkat Puseur jeung di Korps Alumni Damas.
Tulisanana winangun carpon kungsi jadi Juara I Pasanggiri D.K. Ardiwinata nu diayakeun ku Paguyuban Pasundan (1996), sarta kungsi dilélér hadiah sastra ti LBSS (1997). Atuh wangun puisina kungsi dua kali noron jadi Pinunjul I LBSS (1999, 2000). Carponna “Serat Bimbang” nu dimuat di Bandung Pos kungsi dilélér Hadiah Sastra ti Déwan Kesenian Jakarta (1999).
Bukuna nu geus medal nyaéta kumpulan carpon Lalakon Bingbang. Sedengkeun tulisan séjénna dimuat dina buku antologi Nyurup Lambak, Kanagan, Ti Pulpén tepi ka Pajaratan Cinta, Campaka Mangkak, Heulang nu Ngajak Béngbat, Néangan Bulan, Surat Cinta Pangarang Sunda, sarta Antologi Puisi Indonesia. Ayeuna Dian mancén gawé di Universitas Pendidikan Indonesia (UPI).
Citakan I, 2012; 14,5 x 21 cm.; 52 kaca; Rp 15.000,-
Komentar