Penerbit Kiblat Buku Utama

DALINGDING ANGIN JANARI

2008-03-18T18:32:00.000-07:00

Usép Romli H.M.
Dalingding angin ti masjid, karék liwat dina panineungan Fénny. Tacan namper dina lelembutanana. Tapi Néndah yakin, bakal aya parobahan. Isuk jaganing pagéto. Sanajan duka iraha.
Kullu man alaiha fanin. Sakur nu kumelendang, taya nu langgeng di alam dunya.
Dalingding angin ti masjid ogé, moal saukur nebak saliwatan dina panineungan. Pasti hiji waktu bakal namper saendeng-endeng dina lelembutan. Dina galura kamarudahan Fénny. Isuk pagéto. Atawa biheung iraha.
Ukur Alloh Nu Maha Uninga.
Citakan I, 2007; 14,5 x 21 cm; 68 kaca; Rp 15.000,-

OCHANK

2008-03-18T18:30:00.000-07:00

Novelet Barudak Basa Sunda
Tatang Sumarsono
“Itu tuh, euy!” cék nu saurang bari malédogkeun guruntulan taneuh garing.
Enya baé oray bedul, cék Ochank dina haténa. Awakna gedé semu buntet, sisitna mani hérang.
Oray téh dikepung ku lobaan, bari ditarimbulan. Bek aya anu keuna kana awakna. Oray ngagorémpal, tapi terus ngaléor deui. Ku barudak terus dibeberik.
“Enggeus euy, tong dipaéhan!” omong Ochank bari ngahalangan budak anu mamawa paneunggeul.
“Halik tong ngagokan!”
“Ih, antep! Karunya,” omong Ochank deui bari angger ngahalangan.
Tapi budak anu mawa awi téh kalah ngahabek satakerna, sabot oray ngaléor kana deukeut suku Ochank.
Atuh puguh waé, jadi suku anu kateunggeul téh.
Citakan I, 2007; 14,5 x 21 cm; 52 kaca; Rp 15.000,-

SI SEKAR PANGGUNG

2008-03-14T18:58:00.000-07:00

Novelet Barudak Basa Sunda
Tatang Sumarsono
Entom gancang ngaderegdeg, rék nyusul Si Panggung anu ku Kang Gilang geus dibalikkeun arahna. Gancang dicekel kadalina, bari ditepakan beuheungna. Késang Si Panggung rembes saawak-awak.
Sabot kitu, announcer ngumumkeun: “Juara kesatu... kuda nomor tujuh... Sekar Panggung! Ya, Sekar Panggung dari istal Mayang Kencana, milik Haji Tantowi..., Bandung...!”
Saharita Entom langsung susurakan. Cacak mun keur henteu nungtun kuda, jigana bakal ajrag-ajragan, atawa boa terus maksakeun koprol dina track.
Citakan I, 2007; 14,5 x 21 cm; 60 kaca; Rp 15.000,-

UNDANG-UNDANG DASAR NAGARA RÉPUBLIK INDONÉSIA TAUN 1945

2008-03-14T18:51:00.000-07:00

Undang-Undang Dasar Nagara Républik Indonésia Taun 1945 nu disundakeun tur dimuat dina ieu buku téh nyaéta Undang-Undang Dasar Nagara Républik Indonesia Taun 1945 dina Sanaskah, nyaéta gundukan tina Undang-Undang Dasar Nagara Républik Indonésia Taun 1945 Naskah Asli, Parobahan Kahiji, Parobahan Kadua, Parobahan Katilu, jeung Parobahan Kaopat.
Citakan I, 2007; 14,5 x 21 cm; 100 kaca; Rp 25.000,-

POLEMIK UNDAK-USUK BASA SUNDA

2008-03-14T18:45:00.000-07:00

Panganteur: Dodong Djiwapradja
Naha enya undak-usuk basa Sunda téh teu perlu dipaliré deui lantaran teu luyu jeung alam démokrasi tur mangrupa warisan jaman féodal?
Dina ieu buku, kalayan tandes Ajip Rosidi nembrakkeun pamadeganana. Dipairan ku lima tokoh Sunda: Saini K.M., Djadja Sargani, Fatimah Idat, Béni Setia, jeung Popo Iskandar. Teu kantun, Dodong Djiwapradja gé nyodorkeun sawanganana sa-cara gamblang. Kacindekanana moal hamham deui milu ngarojong tarékah urang nanjeurkeun cecekelan, kumaha jeung rék dikumahakeun undak-usuk basa Sunda téh dina kamekaran basa jeung kahirupan urang Sunda umumna.
Citakan II, 2007; 14,5 x 21 cm; 96 kaca; ISBN 979-3631-96-1; Rp 20.000,-

SAJAK SUNDA

2007-02-23T08:17:00.000-08:00

Dipilih tur dipanganteuran ku
Ajip Rosidi
Dina sajarahna anu tacan kungsi satengah abad, kabuktian sajak dina basa Sunda téh geus ngahontal ajén anu bisa dipikareueus jeung geus miboga tradisi anu pageuh ngakar dina kahirupan budaya. Sajak, cara dangding nu mangrupa wangunan sastra anu jolna tina pangaruh sastra dina basa séjén, dina basa Sunda geus tumuwuh kalawan séhat tur réa sastrawan Sunda anu némbongkeun karancagéanana ku nyipta sastra dina éta wangunan. Cindekna wangunan sajak dina basa Sunda anu waktu mimiti diwanohkeun dina sabudeureun tahun 1950 réa meunang panolak ti jalma-jalma anu kabungbulengan ku dangding, kiwari geus jadi wangunan anu mapan, tur geus ngabeungharan sastra Sunda ku ciptaan-ciptaan anu luhur ajénna.
Buku Sajak Sunda anu eusina ngan sajak wungkul, ngabuktikeun hal éta. Dina ieu buku dimuat sajak-sajak anu ku nyusunna dianggap miboga ajén pikeun dipidangkeun. Ieu buku lain baé mangrupa kabeungharan khazanah sastra Sunda, tapi mangrupa wujud budaya anu baris jadi warisan pikeun generasi anu pandeuri.
Cit. I, 2007, 14,5 x 21 cm.; 692 kaca; ISBN 979-3631-95-3; Rp 98.000,-

URANG SUNDA JEUNG BASA SUNDA

2007-02-23T08:12:00.000-08:00

Ajip Rosidi

Tina kanyataan sapopoé, katingal yén urang Sunda beuki réa anu embung nyarita ku basa Sunda. Salah sahiji sababna nyaéta henteu ngarasa reueus kana basa Sunda, sanajan ceuk sawatara ahli basa Sunda téh basa anu pangbeungharna, panglemesna, jeung pangngeunahna didéngékeunana.
Buku Urang Sunda jeung Basa Sunda hayang ngahudangkeun kareueus urang Sunda sangkan nyarita basa Sunda, lain baé jeung babaturanana sapantar atawa jeung salaki atawa pamajikanana baé, tapi pangpangna jeung barudakna nu jadi ahli waris anu sah pikeun manjangkeun umur basa Sunda sangkan lana di dunya.
Cit. I, 2007; 14,5 x 21 cm.; 184 kaca; ISBN 979-3631-80-5; Rp 30.000,-

OLéH-OLéH PERTEMPURAN

2007-01-12T19:05:00.000-08:00

Rukmana Hs.
Sabada maca Oléh-Oléh Pertempuran, barudak Sunda anu henteu kungsi ngalaman révolusi, nu henteu boga gambaran kumaha saenyana kayaan jaman harita, ngaliwatan hasil kréasi nu imajinatif, baris boga gambaran anu leuwih riil ngeunaan mangsa harita. Cindekna, carita-carita Rukmana Hs. Bisa dianggap minangka saksi ngeunaan patriotisme jeung kaihlasan para pamuda Sunda dina enggoning ngabéla kamerdékaan bangsana.
Cit. I, 2006; 14,5 x 21 cm.; 182 kaca; ISBN 979-3631-94-5; Rp 28.000,-

KAMUS BASA SUNDA R.A. DANADIBRATA

2007-01-12T19:01:00.000-08:00

Panitia Penerbitan Kamus Basa Sunda
Kiblat Buku Utama jeung Universitas Padjadjaran
(Edisi Hardcover)
Kamus basa Sunda medal deui. Ayeuna mah R.A. Danadibrata (1905-1987) nu nyusunna téh. Hasil kumpal-kempil kukumpul kekecapan salila 40 taun éta téh. Ti 1930-1970-an persisna mah. Munasabah mun jumlah éntrina pangréana, 40.000 kitu atuh.
Mangga bandingkeun sareng kamus basa Sunda liana. Katara geura onjoyna. A Dictionary of the Sunda Language of Java (1862) anu disusun ku Jonathan Rigg, éntrina ngan 9.308. Kamus Basa Sunda (1948) yasana Sacadibrata ngan ngawadahan 18.000 éntri. Demi Soendaas-Nederlands Woordenboek (1984) anu disusun ku F.S. Eringa ngan nepi ka 22.500 éntri.
Lebah dinya nyongcolangna Kamus Basa Sunda R.A. Danadibrata téh. Nu matak salila 150 taun lalakon nyusun kamus basa Sunda, sigana nya R.A. Danadibrata pisan nu bias ngalengkepan kandaga kamus Sunda. Geuning sidik basa Sunda téh beunghar.
Cit. I, 2006; 18,5 x 24,5 cm.; 782 kaca; ISBN 979-3631-93-7; Rp 275.000,-

LAGU LIWUNG URANG BANDUNG

2007-01-12T18:59:00.000-08:00

Apung S. Wiratmadja
Lagu Liwung Urang Bandung nu ngamuat 30 dangding jeung dua sawér téh ngébréhkeun rupaning rasa anu pagaliwota jeroeun dada Apung S. Wiratmadja. Taya lian nu dipicangcamna téh nanasiban anu karandapan ku dayeuh Bandung kiwari. Boh nu gérengna. Bohn nu hadean.
Cit. I, 2006; 14,5 x 21 cm.; 72 kaca; ISBN 979-3631-92-9; Rp 15.000,-

SURAH YAA SIIN

2007-01-12T18:57:00.000-08:00

Tarjamahna Dina Basa Sunda
Sareng Sari Tilawahna Winangun Pupuh
Kenging Drs. Hr. Hidayat Suryalaga
Citakan I, 2006; 14,5 x 21 cm.; 48 kaca; Rp 15.000,-

TATARUCINGAN URANG SUNDA

2007-01-12T18:55:00.000-08:00

Beunang Ngumpulkeun Rachmat Taufiq Hidayat & Darpan, S.Pd.
Sanajan tatarucingan parantos lami dipikawanoh ku urang Sunda, tapi dugi ka danget ayeuna, teu acan seueur anu leukeun ngempelkeunana dina wangun buku. éta baé dina mangsa saratus taun téh, urang ngan ukur mendakan opat buku tatarucingan. Padahal, tatarucingan urang Sunda téh teras nambihan ti wanci ka wanci, sumebar sacara lisan di kalangan barudak Sunda, sareng bacacar dina majalah-majalah basa Sunda.
Ieu buku midangkeun sawatara conto tatarucingan anu mindeng jadi bungbu heureuy urang Sunda, pangpangna di lingkungan barudak.
Cit. I, 2006; 14,5 x 21 cm.; 64 kaca; ISBN 979-3631-66-X; Rp 15.000,-

SURAT KEUR BANDUNG

2007-01-12T18:52:00.000-08:00

Kumpulan Sajak Paguyuban Panglawungan Sastra Sunda
Kota Bandung téh merenah pisan upami disebat Kota Inspirasi, pangpangna kanggo para sastrawan Sunda, hususna panyajak.
Niténan sajak-sajak dina ieu buku, ébréh pisan kaayaan dayeuh Bandung ti mangsa ka mangsa nu diserat ku panyajak unggal entragan. Ditingal tina titimangsana, sajak-sajak dina ieu buku téh ngagambarkeun kaayaan Bandung ti taun 1957 dugi ka 2005. Sanaos sajak nu kapidangkeun di dieu téh henteu lengkep saban taun, nanging ditingal dina panyajakna mah méh saban entragan kawakilan.
Cit. I, 2006; 14,5 x 21 cm.; 76 kaca; ISBN 979-3631-65-1; Rp 18.000,-

MANGSI ASIH KALAM TRESNA

2007-01-12T18:51:00.000-08:00

Kumpulan Surat Cinta
Paguyuban Panglawungan Sastra Sunda
TÉMA cinta nu kapihatur dina ieu buku diwujudkeun dina rupi-rupi kaayaan: rasa bagja, brangta, sugema, sono, égo, sedih, peurih, honcéwang, ngawang-ngawang, waas, tur baluas. Kapan lebah dinya pisan onjoyna rasa cinta téh. Cinta mah sajuta rasa, mampuh meruhkeun angkuh, sakti ngikis kaijid, luhung mupus adigung; malah nu borangan jadi ludeungan, nu galak jadi taak. Singsaha waé nu keur diayun-ambing ku cinta, moal ngitung untung rugi, jauh tina lewang jeung longkéwang; nu kebek dina dada nya éta geter asmara. Ieu buku midangkeun serat cinta kénging welasan pangarang Sunda.
Citakan I, 2006; 14,5 x 21 cm.; 64 kaca; ISBN 979-3631-73-2; Rp 15.000,-

KéOM SAKEDAP

2007-01-12T18:48:00.000-08:00

Humor Urang Sunda di Internét
Syam Ridwan
Kamahéran Syam Ridwan nulis carita heureuy nu ngandung otokritik, sindiran jeung parodi geus némbongkeun kualitas dirina nu cocog pikeun jadi Ketua Partéy Seuri Nasional, Jubir Presidén Urusan Seuri, Mantri Nagara Koordinator Seuri Rakyat atawa Mantri Nagara Peningkatan Peranan Seuri. Pantes ogé jadi Wagub Jabar widang pangwangunan seuri Sunda. Atuh paling henteu ogé jadi bupati di lemburna sorangan, Sumedang. —MANG JAMAL, Kuncén KUSnét jeung tukang seuri (sorangan)
Citakan I, 2006; 14,5 x 21 cm.; 76 kaca; ISBN 979-3631-79-1; Rp 15.000,-

DULAG NALAKTAK

2007-01-12T18:46:00.000-08:00

Usép Romli H.M.
Numutkeun Kang Ibing mah, nulis carita humor téh leuwih hésé ti batan ngabodor dina panggung. “Ngabodor dina panggung mah langsung katénjo seuri jeung teu seurina jelema téh. Ari ku tulisan mah, teuing.”
Dulag Nalaktak téh mangrupa buku kumpulan carita humor Usép Romli H.M. anu panganyarna. Tina judulna gé moal boa bakal ngahudang kapanasaran. Mun henteu ngeunah seuri nepi ka ngehkey nyeri kulit beuteung jeung sééleun, atuh sakurang-kurangna nu maca bakal imut kanjut. Tapi mun rék sura-seuri sorangan, omat kudu luak-lieuk heula bisi aya nu nyérangkeun.
Citakan I, 2006; 14,5 x 21 cm; 144 kaca; ISBN 979-631-67-8; Rp 13.000,-

BéNTANG PASANTRéN

2007-01-12T18:44:00.000-08:00

Usép Romli H.M.
Béntang Pasantrén nyaritakeun katresna santri ka putra ajenganana anu jadi rebutan lurah santri jeung santri kahot séjénna. Ku katapisna dina nyusun ungkara anu direumbeuy ku humor jeung kekecapan has pasantrén—beunang nyutat tina Qur’an, hadis, jeung kitab lianna, ieu karya Usép Romli H.M. téh kaasup kana karya petingan anu milu ngabeungharan sastra Sunda.
Citakan II, 2006; 14,5 x 21 cm.; 72 kaca; ISBN 979-3631-71-6; Rp 18.000,-

PANGGEUING: HARéWOS TUTUGAN GUNUNG

2007-01-12T18:39:00.000-08:00

Hasil Pasanggiri Nulis Puisi Kehutanan Tingkat SLTP-SLTA Sa-Tatar Sunda
Perum Perhutani Unit III Jawa Barat & Banten
Buku puisi Sunda kehutanan Panggeuing ogé raket jeung pancén Pangwangunan Jawa Barat anu kalima, “Membangun Kehidupan Sosial Berlandaskan Budaya Daérah.” Dina hal ieu ku urang rajeun disebut pangwangunan anu ramah budaya. Sadayana mangrupi tarékah ngamasarakatkeun katut ngawanohkeun lingkungan keur masarakat utamana kanggo kaom nonoman. — Drs. H. DANNY SETIAWAN, M.Si., GUPERNUR JAWA BARAT
Citakan I, 2005; 14,5 x 21 cm.; 60 kaca; Rp 11.000,-

SI PUCUK KALUMPANG

2007-01-12T18:37:00.000-08:00

Dongéng Sunda Buhun
Ajip Rosidi
“Ema, Ema!
Nu nyaah lain ceuk béja!
Na naon nu beureum-beureum
Dina suku mani euceuy?”
Ku katelengesan bapana sorangan, Si Pucuk Kalumpang kudu naék kana tarajé bedog anu kacida seukeutna. Unggal-unggal manéhna nété kana hambalan tarajé, aya baé bagian awakna anu kakeureut, tepi ka ahirna mah ngalumbuk siga daging nu dicacag. Ku bapana daging Si Pucuk Kalumpang téh diparabkeun ka Si Jelug, hayam jago kukutanana.
Citakan II, 2005; 14,5 x 21 cm.; 44 kaca; ISBN 979-3631-60-0; Rp 10.000,-

NYI BUNGSU RARANG

2007-01-12T18:35:00.000-08:00

Dongéng Sunda Buhun
Ajip Rosidi
Nyi Bungsu Rarang nyaritakeun budak bungsu anu dikaniaya ku lanceuk-lanceukna sorangan. Unggal poé manéhna kudu digawé paéh poso supaya bisa dahar keur manéhna jeung keur Si Leungli, lauk emas piaraanana. Tapi dina hiji poé, waktu Nyi Bungsu Rarang keur digawé, Si Leungli dipaling ku lanceuk-lanceukna, tuluy diasakan pikeun deungeun sangu, didahar balakécrakan.
Basa nyahoeun Si Leungli leungit, Nyi Bungsu Rarang kacida kuciwana. Barang ditanyakeun ka lanceuk-lanceukna, hiji ogé euweuh nu ngaku. Waktu ditéangan ngan ukur kapanggih huluna wungkul. Ku manéhna, hulu Si Leungli diboéhan, tuluy dikubur di jero imahna. Teu lila ti harita, di imahna melentung sirung nepi ka jadi tangkal anu kacida ahéngna. Sabab daunna, kembangna jeung buahna téh kabéh ogé mangrupa emas permata.
Citakan II, 2005; 14,5 x 21 cm.; 44 kaca; ISBN 979-3631-60; Rp 10.000,-

NU NGAGEGEUH LEGOK KIARA

2007-01-12T18:32:00.000-08:00

Dadan Sutisna
(Dilélér Hadiah Samsoedi 2002)
Teu jauh ti lembur aya tangkal kiara nu umurna geus ratusan taun. Caranéom, geueuman, disebutna Legok Kiara. Réa dongéngna Legok Kiara téh. Cenah nu ngalanto ka dinya mah balikna sok terus gering. Dipahing pisan barudak ulin ka Legok Kiara, komo wanci sareupna mah da cenah aya nu ngageugeuhna.
Hiji mangsa, basa keur milu moro beurit, Emod jeung Si Sadun ulinna kamalinaan. Teu engeuh geuning maranéhna téh sasab ka Legok Kiara. Tempat nu kacaturkeun sanget téa. Naha aya naon di Legok Kiara téh? Kumaha nasib Emod jeung Si Sadun?
Cit. II, 2005; 14,5 x 21 cm.; 51 kaca; ISBN 979-3631-70-8; Rp 12.500,-

CARITA NYI HALIMAH

2007-01-12T18:27:00.000-08:00

Samsoedi
Carita Nyi Halimah ngalalakonkeun katawekalan budak awéwé anu katalangsara. Indung-bapana anu asalna beunghar jadi jelema masakat. Basa bapana diasupkeun ka pangbérokan alatan pitenah deungeun, indungna kagegeringan nepi ka hanteuna pisan. Saterusna Nyi Halimah cicing di ninina bari digawé di imah Nyonya Linn. Basa kapanggih metik kekembangan di kebon pipireun gedong dununganana, manéhna disiksa ku Nyonya Linn nepi ka asa bubuk huluna, getih tina sirahna nyarakclakan kana bajuna. Waktu keur nyekar di kuburan indungna, manéhna kapanggih ku tuan nu keur bebedil, tuluy diajak digawé di imahna. Ti harita manéhna teu kendat-kendat meunang rupa-rupa cocoba anu kacida beuratna, nepi ka ngalaman diasupkeun ka pangbérokan sagala rupa.
Cit. II, 2005; 14,5 x 21 cm.; 100 kaca; ISBN 979-3631-52-X; Rp 19.000,-

PEPERENIAN URANG SUNDA

2007-01-12T18:25:00.000-08:00

Rachmat Taufiq Hidayat spk.
Peperenian Urang Sunda enas-enasna mah hayang némbongkeun kaunikan basa Sunda. Éta kaunikan téh tangtu némbongkeun pangalaman hirup urang Sunda anu mibanda konvénsi budaya sorangan. Pangpangna mah tangtu baé bisa nuduhkeun tradisi masarakat Sunda ti waktu ka waktu. Tradisi anu lahir tina kabiasaan-kabiasaan hirup urang Sunda téh medalna henteu sabongbrong. Mun nilik kana wawangunan imah, pakakas, kadaharan jeung inuman, pakasaban, atawa réana babasan jeung paribasa anu kekecapanana nyokot tina ngaran-ngaran tutuwuhan jeung sasatoan, tanwandé éta téh némbongkeun yén masarakat Sunda hirup sapopoéna deukeut jeung lingkungan alam.
Cit. I, 2005; 14,5 x 21 cm.; 288 kaca; ISBN 979-3631-57-0; Rp 36.000,-

NU LUNTA PEUTING

2007-01-12T18:23:00.000-08:00

Juniarso Ridwan
Sajak-sajak Juniarso téh umumna ngedalkeun suasana nu prihatin, malah tampolana sedih. Demi pikeun ngedalkeun kasedih jeung kaprihatin nu ngancik di sumur batin, gambaran ngeunaan kaayaan di luareun diri pohara dipentingkeunana. Ungkara-ungkara nu sipatna deskriptif tur metaforis kaya-ning “girimis nu nyuruwuk” atawa “walungan nu guligah” upamana, ditekenkeun sangkan luyu jeung gerentes haté nu deuk dikedalkeun. Nu ditekenkeunana, babakuna lain naon nu katémbong di luareun diri, tapi naon nu karasa di jero diri. — Hawé Setiawan
Citakan I, 2005; 14,5 x 21 cm.; 92 kaca; ISBN 979-3631-64-3; Rp 18.500,-

MASYITOH

2007-01-12T18:21:00.000-08:00

Ajip Rosidi
Waktu Kangjeng Rasulullah Saw. Isra ti Masjidil Haram di Mekah ka Masjidil Aksha di Darussalam, ngambah buana nu keur ngageubra saré, nitih burok nu lumpatna sagancangeun kilat, pelenghir aya aangseuan nu kalintang seungitna, dugi ka reg anjeunna ngarandeg, pok naros ka malaikat Jibril nu nyarengan jajap.
”Naon ieu téh mana seungit-seungit teuing, ya Jibril?”
”Seuseungitan nu asalna ti makamna Masyitoh.”
”Saha ari Masyitoh téh?”
”Hiji emban urang Israil nu ngawulaan putrina Fir’aon, nu geus ditibanan hukum-pati, ku lantaran henteu daék ninggalkeun kapercayaanana ka Allah SWT. Masyitoh milih tumpur-lebur sapiri-umpi manan kudu mangéran ka Fir’aon papada jelema ....” (tina hiji hadis)
Cit. I, 2005; 14,5 x 21 cm.; 100 kaca; ISBN 979-3631-53-8; Rp 20.000,-

KAMUS BASA SUNDA

2007-01-12T18:17:00.000-08:00

R. Satjadibrata
Dina sajarah léksikografi Sunda, Kamus Basa Sunda yasana Radén Satjadibrata téh kalebet kamus Sunda munggaran nu disusun ku urang Sunda... Satjadibrata kagungan kasadar wiréh “karaos perlu teu kinten ayana kamus nu kénging didamel tuduh jalan, nyaéta kamus Sunda nu diterangkeun ku basa Sunda tur diangken ku ahli basa Sunda, yén leres kateranganana. Hanjakal pisan teu aya, kamus sarupi kitu téh.” (Pihatur R. Satjadibrata dina Kamoes Basa Soenda citakan ka-1, 1948, k. 3).
Miang tina kasadar sarupa kitu, Satjadibrata ihtiar sakedah-polah sangkan kecap-kecap basa Sunda téh diterangkeun nepi ka bubuk leutikna. Nya janggélék wé jadi kamus Sunda anu munggaran téa. — Rachmat Taufiq Hidayat
Cit. I, 2005; 14,5 x 21 cm.; 428 kaca; ISBN 979-3631-44-9; Rp 69.000,-

JAGAT CARITA

2007-01-12T18:14:00.000-08:00

Kandaga Carpon Dunya
Hawé Setiawan
Jagat Carita bisa jadi buku kumpulan carpon munggaran nu ngariungkeun karya sastra pangarang dunya dina basa Sunda. Nu geus medal mah réréana dina wangun novél. Opat welas pangarang ngariung dina Jagat Carita. Tilu ti antarana kungsi dilélér Hadiah Nobél Sastra: Rabindranath Tagore, Luigi Pirandéllo jeung Hérman Hésse. Ku lantaran nu ngarangna euyeub, norojol ti rupa-rupa bangsa, rasa jeung nuansa carpon-carpon dina ieu buku béda-béda. Cocog pisan dibaca ku urang Sunda pikeun babandingan, ngajembaran panalar kana karya sastra bangsa lian.
Citakan I, 2005; 14,5 x 21 cm.; 152 kaca; ISBN 979-3631-58-9; Rp 30.000,-

HAREWOS NU GAIB

2007-01-12T18:12:00.000-08:00

Ki Umbara
Carita Ki Umbara umumna miboga amanat moral anu ngélingan nu macana sangkan ulah migawé lampah anu pasalia jeung ajaran agama, dina hal ieu agama Islam.
Soal moral umumna jadi dasar utama carita Ki Umbara saperti dina carpon “Haréwos nu Gaib upamana.
Citakan I, 2005; 14,5 x 21 cm.; 112 kaca; ISBN 979-3631-55-4; Rp 19.000,-

GEUS SURUP BULAN PURNAMA

2007-01-12T18:09:00.000-08:00

Yous Hamdan
(Dilélér Hadiah Rancagé 2006)
Geus Surup Bulan Purnama nyaritakeun suasana nalika Rosul pupus: alum nguyungna para sahabat jeung reueuk ceudeumna langit Madinah harita. Waktu maca ieu carpon, pikiran jeung rarasaan urang bakal dibawa ka hiji mangsa, ka hiji tempat, nu kahalang ku anggang waktu rébuan taun. Implengan urang bakal anjog ka dinya, ka hiji tempat: bumi Rosululloh. Urang asa ningal layon Rosul nu ngalungsar, alumna para sahabat, juuhna cimata, sareng Bilal nu nyuuh, kalebuh dina kasedih jeung kapeurih batinna. — AHMAD HADI
Citakan I, 2005; 14,5 x 21 cm.; 108 kaca; ISBN 979-3631-63-5; Rp 19.000,-

BUMéLA KA BANGSA

2007-01-12T18:07:00.000-08:00

Biografi R.S. Hardjapamekas
Dina ieu buku, R.S. Hardjapamekas medar pangalamanana nu nyorang jaman Walanda, jaman fasismeu Jepang, jaman kamerdékaan jeung jaman satutas kamerdékaan. Pa Hardja ngalaman parobahan karir ti mimiti jadi pagawé pamaréntahan nepi ka jadi guru.
Basa anjeunna masih kénéh didamel jadi pagawé pamaréntahan, lantaran anjeunna tiasa nyarios basa Jérman kalawan tapis, terus diperedih pikeun ngajar di sakola. Dina paro taun 1950-an, anjeunna hijrah ka Jérman pikeun neuleuman pangaweruhna kana basa Jérman salila sataun.
Buméla ka Bangsa, medar pangalaman hiji guru anu percaya kana kasauran Friedrich Fröbel, “Ngatik téh saéstuna ngawarah diri sorangan jeung méré conto, lian ti éta mah ngan kanyaah.”
Cit. I, 2005; 14,5 x 21 cm.; 192 kaca; ISBN 979-3631-34-1; Rp 35.000,-

BéNTANG LAPANG

2007-01-12T18:05:00.000-08:00

RAF
Béntang Lapang nyaritakeun kahirupan maén bal jeung para béntang lapangna. Kalayan tapis, RAF ngagambarkeun kumaha pamaén senior ngarasa kaéléhkeun ku pamaén yunior nu dia-suhna, nepi ka téga minangsaraya ka pihak lawan supaya “ngababad” anak asuhanana. Digambarkeun deuih kumaha pamaén anu ngora, sanajan maénna can alus, gampang disogok ku tukang judi, jeung kumaha kuciwana pangasuhna waktu nyaho anak asuhanana narima sogokan.
Citakan I, 2005; 14,5 x 21 cm.; 92 kaca; ISBN 979-3631-54-6; Rp 18.500,-

BABASAN & PARIBASA

2007-01-12T18:04:00.000-08:00

Kabeungharan Basa Sunda
Ajip Rosidi
Pikeun ngumpulkeun babasan jeung paribasa anu dimuat di dieu, pangarang nyutatan babasan jeung paribasa anu kasampak dina karya sastra para pangarang Sunda nu geus moal bireuk deui. Minangka conto dipakéna babasan jeung paribasa anu dimaksud, pangarang nyutat kalimah anu ngagunakeun éta paribasa tina buku-buku anu dijadikeun sumber.
Buku ngeunaan babasan jeung paribasa téh, lain baé perelu dina hirup kumbuh urang Sunda kiwari anu beuki jauh tina basa Sunda, tapi pangpangna mah sangkan jadi cecekelan urang Sunda anu hayangeun boga référensi ngeunaan basana jeung sakaligus mangrupa gambaran ngeunaan kakayaan batin Ki Sunda.
Cit. I, 2005; 14,5 x 21 cm.; 192 kaca; ISBN 979-3631-46-5; Rp 35.000,-

AYANG-AYANG GUNG

2007-01-12T18:01:00.000-08:00

Petikan Surat-Surat 1980-1986
Ajip Rosidi; Dipanganteuran ku H. Usép Romli H.M.
“Surat-surat Ajip Rosidi dina buku ieu ngajak urang (umat Islam) ngoréksi diri (muhasabah), ngahudangkeun kasadaran (ay-yaqzah) jeung ngoméan kaayaan nu salah (at-taubah), ngaliwatan méntal nu kuat ku kawani, pikir nu masagi ku wawasan, sarta tanaga nu nyukupan ku kawisésaan.”— H. Usép Romli H.M
Citakan I, 2005; 14,5 x 21 cm; 312 kaca; ISBN 979-3631-20-1; Rp 55.000,-

BABALIK PIKIR

2007-01-10T01:01:00.000-08:00

Samsoedi
Kawantu budak ngan hiji-hijina, Si Eméd diogo ku indungna. Ari tabéatna bengal kabina-bina, ka kolot sok bahula, ana dititah kacida liwarna. Dasar budak basangkal, remen migawé lampah salah, Si Eméd téh dina pamustunganana mah nepi ka dikerem di pangbérokan sagala. Tah, nya ti harita Si Eméd babalik pikir, hayang ngeureunan kasalahan, éling di bebeneran.
Kitu leuwih kurangna mah lalakon Si Eméd nu didongéngkeun dina Babalik Pikir téh. Lebah ngarang carita barudak mah Samsoedi téh manukna.
Citakan I, 2004; 14,5 x 21 cm.; 72 kaca; Rp 14.500,-

URANG SUNDA MUNGGAH HAJI

2007-01-10T00:59:00.000-08:00

Maman M.S.
Lalampahan pangarang ka tanah suci anu sakabéhna ditulis dina wangun carita pondok, taya kesan jiga ngahaja-haja hayang ngébréhkeun sikep, pamadegan katut pamanggihna kana unak-anik rukun Islam anu kalima. Méh sakabéhna carita pondok nu dikumpulkeun dina ieu buku aya muatan humorna ti nu kasebutna carita pondok lucu, cara “Wadah Heucak”, “Ku Tutur”, jeung “Pibésaneun”; atawa situasi nu matak kapiasem lantaran ku kaayaan (komédi situasi) upamana waé dina “Ngantay” jeung “Ciri” nepi ka humor nu ngandung lenyepaneun (”Buka” jeung “Haji Murah”). — Duduh Durahman
Citakan I, 2004; 14,5 x 21 cm.; 165 kaca; ISBN 979-3631-31-7; Rp 33.000,-

SURA-SEURI SUNDA

2007-01-10T00:58:00.000-08:00

H.D. Bastaman
Aya nu nyarita yén mun urang pareng aya di luar negeri hég panggih jeung rombongan nu laleumpangna santéy bari saleuseurian, biasana éta téh rombongan urang Indonésia. Tah, mun aya di antarana nu seuri pangkacirina huntu, moal salah deui inyana téh urang Sunda. Da kawentar atuh urang Sunda mah beuki seuri jeung tukang heureuy. Malah jejer obrolan nu matak pogot keur urang Sunda mah cenah nu pikaseurieun, pikasieuneun, jeung pipanasaraneun. Naon cing? Nyaéta dongéng lulucon, dongéng jurig jeung ririwa, jeung dongéng jorang.
Cit. I, 2004; 14,5 x 21 cm.; 112 kaca; ISBN 979-3631-29-5; Rp 22.500,-

SURAT KEUR KA SAWARGA

2007-01-10T00:56:00.000-08:00

Kumpulan Carpon Sastrawati Sunda PATREM
Réa sastrawati nu karyana terbit mandiri. Teu kurang deuih nu karyana punjul tur meunang hadiah. Geus tangtu karya-karya éta téh bakal jadi pangrojong kana kamajuan sastra Sunda hususna, budaya Sunda umumna. Tapi ayana kumpulan carpon sastrawati Sunda ogé teu kurang pentingna. Kumpulan carpon téh bakal méré gambaran kumaha pandangan para sastrawati Sunda kana kahirupan ayeuna jeung kahirupan jaman nu bakal kaalaman. Sanajan karya mandiri hiji sastrawati bakal méré pangalaman nu leleb ka nu macana, kumpulan carpon aya punjulna, nyaéta di sagigireun leleb, pangalaman nu kaalaman ku nu maca téh bakal leuwih jembar.
Cit. I, 2004; 14,5 x 21 cm.; 98 kaca; ISBN 979-3631-32-5; Rp 20.000,-

SURAT CINTA PANGARANG SUNDA

2007-01-10T00:54:00.000-08:00

Dikumpulkeun ku Paguyuban Panglawungan Sastra Sunda (PP-SS)
Cinta mah hiji hal nu universal kaalaman ku manusa. Saha waé ogé tangtu ngalaman kaéndahan rasa cinta, ngalaman kapeurih tina asih; ngalaman gumulungna kadeudeuh jeung kaceuceub atawa aworna katresna jeung katimburu nu ahirna ngamuara kana lautan asmara nu ngagalura. Saha waé nu keur katerap asmara, tangtu ngarasakeun kaéndahan alam dunya nu taya papadana, malah kalan-kalan rasa kaéndahan cinta téh bisa ngajanggélékkeun hiji jalma jadi panyajak atawa pangarang. Kecap-kecap tur kalimah éndah jul-jol ‘na pikiran, galécok ‘na haté, laju diwujudkeun ‘na réngkolan sajak atawa surat.
Citakan I, 2004; 14,5 x 21 cm.; 98 kaca; ISBN 979-3631-30-9; Rp 20.000,-

SUDAGAR BATIK

2007-01-10T00:51:00.000-08:00

Ahmad Bakri
Si Kasja ngejat. Mimitina mah dicarékan ku bapana, tapi bet kalepasan, nepi ka diteunggeulna pisan. Ari geus karuhan anakna minggat mah, Bapa Si Kasja teu burung kaduhung, terus baé ditéangan. Tapi sanggeus sababaraha poé, lebeng euweuh raratanana. Tungtungna Bapa Si Kasja gering, nepi ka maotna.
Sanggeus ditinggalkeun ku salakina, Bi Arwiah hirup kadua anakna, Si Inén. Pagawéanana ukur buburuh. Sawah geus euweuh, urut mulasara salakina. Kumaha atuh ari nasib Si Kasja? Naha hirup kénéh atawa geus maot?
Cit. II, 2004; 14,5 x 21 cm.; 81 kaca; ISBN 979-3631-17-1; Rp 16.500,-

SI MAMIH: KARTUN SUNDA

2007-01-10T00:47:00.000-08:00

édyana Latief
Ngaran panjangna mah Mamih Dewok. Sapopoéna disebut Si Mamih. Awakna bayuhyuh, teu matut, paripolahna sakapeung mah minculak. Tapi loba nu resepeun. Mun seug boga pangawakan lenjang, Si Mamih téh éstuning keur “meumeujeuhna”. Si Mamih mah bisa mancala putra-mancala putri; sakapeung jadi parawan, sakapeung geus boga budak, sakapeung jadi… randa. Sapopoéna kawas tara ganti baju, angger wé maké nu totol-totol hideung. Saha ari bapana? Saha deui atuh, lamun lain Édyana Latief Karung, kartunis nu gambar-gambarna remen dimuat dina média massa Sunda.
SI MAMIH (1): Citakan I, 2004; 14,5 x 21 cm.; 102 kaca; ISBN 979-3631-22-8; Rp 15.000,- SI MAMIH (2): Citakan I, 2006; 14,5 x 21 cm.; 68 kaca; ISBN 979-3631-68-6; Rp 15.000,-

SEMPALAN TINA TARéH

2007-01-10T00:45:00.000-08:00

Ki Umbara
Dina carita-carita taréh Ki Umbara, kayakinan tauhid jeung kaihlas dina enggoning nyiar rido Allah téh jadi karasa kongkrit ku sabab dumasar kana kanyataan sajarah, lain ngan wungkul hasil imajinasi pangarangna. Ku metik carita tina taréh, Ki Umbara méré conto nyata ngeunaan prakték tauhid jeung néangan rido Allah anu didadasaran ku kaihlas dina enggoning nyanghareupan jeung narima kadar anu tumiba minangka hasil ngajalankeun kawajiban téa. Maot dina enggoning ngajalankeun kawajiban lain hal anu kudu disingkahan, tapi ditéangan sabab mangrupa jalan kana syahid—kamulyaan maksimal ahir hirup unggal Muslim. — Ajip Rosidi
Citakan I, 2004; 14,5 x 21 cm.; 120 kaca; ISBN 979-3631-24-4; Rp 24.000,-

MURANG MARING

2007-01-10T00:43:00.000-08:00

Godi Suwarna
Para pangagung nagara marawa poster, démonstrasi, lantaran ngarasa diteungteuinganan ku rahayat. Pédah éta, rahayat ngahenang-ngahening, ngeunah nyandang ngeunah nyanding, ari para pamingpin awak begang pikir rungsing. Enya, di nagara nu sugih mukti mah, nu démonstrasi téh pamingpin ka rahayat, sakumaha anu kapanggih dina carpon “Murang-Maring”.
Geus hamo bireuk, kumaha gaya Godi Suwarna dina ngarang carpon. Boa baris dituding ngaruag pakem, ngajungkir-balikkeun logika. Teu kasengker ku alam katut kailaharan. Pangarang ngeunah baé nepungkeun Oidipus jeung Sangkuriang, ngantep Kéan Santang jeung Lodaya terah Pajajaran sina tarung, atawa mapandékeun Si Kabayan ka Si Régang jalma kuru rengkung jangkung lir régang paragi moro langlayangan.
Cit. II, 2004; 14,5 x 21 cm.; 104 kaca; ISBN 978-3631-18-X; Rp 20.000,-

HEULANG NU NGAJAK BéNGBAT

2007-01-10T00:41:00.000-08:00

Antologi Pangarang Paguyuban Panglawungan Sastra Sunda (PP-SS)
Macaan karya dina antologi Heulang nu Ngajak Béngbat tangtu baé macaan jengléngan idé saban pangarangna. Macaan jengléngan kualitas sastrawi nu nyangkaruk na diri pribadina nu diéksprésikeun dina wangunan carpon, sajak, jeung naskah drama. Disawang tina kasang tukang, gaya, jeung pangalamanana katémbong henteu ragem. Atuh lebah kudu ngagayem karya gé éstu bakal cara ngagayem rujak, nu bahan katut rasana béda-béda téa. — Dian Héndrayana
Citakan I, 2004; 14,5 x 21 cm.; 132 kaca; ISBN 979-3631-25-2; Rp 25.000,-

GUNEM RENCEP SIDEM

2007-01-10T00:39:00.000-08:00

Enas Mabarti
Minangka cirina anu mandiri, Enas miang tina pangalaman sapopoé, ti mimiti leuleumpangan mapay-mapay galengan sawah tepi ka jarah ka Mekah jeung ka Madinah. Terus éta pangalaman téh dilenyepan, dipatalikeun jeung wahyu Allah, pidawuh Rosul katut piwulang ulama, tepi ka ngajanggélék jadi implengan filosofis tur réligius, sasat ngajak padungdengan ka nu maracana. Cindekna, sagala rupa nu kaalaman ku pangarang, teu weléh dipatalikeun jeung Kangjeng Nabi katut ageman anu ditepikeun ku mantenna.
"Gunem Rencep Sidem bawirasa geus hasil nepikeun piwulang moral kalawan artistik. Unggal-unggal judulna lir siki hanjeli nu diruntuy hiji-hiji mirupa tasbéh." — Hawé Setiawan
Cit. I, 2004; 14,5 x 21 cm.; 100 kaca; ISBN 979-3631-26-0; Rp 20.000,-

ANAK JADAH

2007-01-10T00:38:00.000-08:00

Kumpulan Carpon Cécép Burdansyah
Ieu pangarang jigana rada kaobsési ku gagasan-gagasan kritis tur inovatif ngeunaan masalah-masalah nu aya dina kahirupan masarakat di sakurilingeun dirina. Di leuweung sastra Sunda mah carpon-carpon nu “nembrakkeun gagasan” cara nu ditulis ku Cécép téh kawilang langka. Mun téa mah aya nu pirajeunan hayang néangan naon nu jadi ciri nu mandiri atawa kakuatan tina carpon-carpon Cécép, bawirasa, salah sahijina mah nyaéta kecendrunganana némbongkeun concern kana gagasan. — Hawé Setiawan
Citakan I, 2004; 14,5 x 21 cm; 116 kaca; Rp 23.500,-

AMANAT DINA NAPAS PANUNGTUNGAN

2007-01-10T00:36:00.000-08:00

Mh. Rustandi Kartakusumah
(Dilélér Hadiah Rancagé 2005) Dayat jeung Duduy, dua sobat nu ninggalkeun sakola alatan hayang bébéla ka lemah cai. Dina napas panungtungan, Duduy méré amanat ka sobatna, sarta omat-omatan sangkan Dayat sanggup nepikeun éta amanat.
Lian ti “Amanat dina Napas Panungtungan”, aya deui carita-carita pondok séjénna nu dimuat dina ieu buku saperti “Mojang Dusun Meledug”, “Laligar Kembang di Paris”, jeung nu séjénna. Ditulis ku basa nu ngaleunjeur, beunang pangarang nu kawentar ku novélna Mercedes 190.
Cit. I, 2004; 14,5 x 21 cm; 116 kaca; ISBN 979-3631-23-6; Rp 23.500,-

AJALNA SANG BéNTANG PILEM

2007-01-10T00:35:00.000-08:00

Duduh Durahman
Érlan Digjaya, béntang pilem sohor, kasampak geus jadi mayit di WC bioskop. Saha nu maténi Sang Béntang Pilem? Naon kasang tukangna?
“Ajalna Sang Béntang Pilem”, salah sahiji carita nu dimuat dina ieu buku. Sawelas carita séjénna, moal éléh ramé, éstuning matak pogot. Pangarangna geus moal bireuk deui, da puguh welasan taun ngasuh rohangan fiksi di majalah Manglé.
Carita detéktif dina ieu buku, méré pedaran ngeunaan panalungtikan kasus-kasus kriminal. Ditulis ku basa nu hirup, tapis dina ngulinkeun logika.
Citakan I, 2004; 14,5 x 21 cm; 140 kaca; ISBN 979-3631-14-7; Rp 28.000,-

UTARA UTARI

2007-01-10T00:33:00.000-08:00

Jeung Dongéng-Dongéng Sunda Lianna
Ki Umbara
(Dilélér Hadiah Samsoedi 2003) Singa sajodo anu kacida galakna ngahaja dikencarkeun. Saha anu bisa maéhan jaluna, baris dijenengkeun raja. Ari anu maéhan bikangna bakal diganjar duit tilu ratus keton emas. Radén Utara bisa maéhan singa jalu. Ari singa bikangna dipaéhan ku Radén Utari. Saenyana éta dua sadulur téh keur ngalalana, pikeun ngalaksanakeun pancén ramana, nyaéta néangan kembang Pancawarna. Ahirna duanana jeneng raja.
Sajaba ti carita Utara-Utari, dina ieu buku aya 15 dongéng petingan lianna. Aya dongéng sasatoan, asal-usul hiji tempat, jeung lalampahan jalma sarakti.
Citakan II, 2006; 14,5 x 21 cm.; 120 kaca; Rp 25.000,-

MISTéRI HAUR GEULIS

2007-01-10T00:32:00.000-08:00

Dadan Sutisna
(Dilélér Hadiah Samsoedi 2004)
Lembur Haur Geulis keur harénghéng, lantaran aya budak nu leungit. Cék kapercayaan urang lembur, éta budak téh kasarung di Leuweung Tutupan, hiji tempat anu sanget pisan. Diran, salasahiji budak nu keur pakanci di Haur Geulis, boga maksud néangan éta budak. Manéhna ngajak baturna, Rina jeung Emod, pikeun ngajugjug Leuweung Tutupan. Mimitina mah, Emod jeung Rina téh arembungeun. Tapi Diran keukeuh hayang néangan éta budak, lantaran kapangaruhan ku buku-buku mistéri anu sok dibaca ku manéhna. Arinditna ti lembur téh rerencepan, da sieun katohyan ku Pa Guru. Kumaha carita saterusna?
Citakan I, 2003; 14,5 x 21 cm.; 84 kaca; Rp 18.900,-

SI LAMSIJAN KAédANAN

2007-01-10T00:30:00.000-08:00

Ki Umbara
Si Lamsijan nu didongéngkeun teu béda ti nu aya dina wayang golék cepak. Pasipatanana teu parok jeung batur, sok ngarasa sagala nyaho tapi saenyana mah bodo katotoloyoh. Ari bogoh ka Si Amoy, tepi ka kaédanan pisan. Ménta tulung ka dukun, malar ngajodo jeung nu dipikasono. Orokaya pélétna kalah nerap ka Si Cepleu.
“Ki Umbara méré conto yén tokoh folklorik nu pasipatan jeung tabéatna geus miboga stéréotip anu geus maneuh sarta dipikawanoh ku balaréa cara Si Lamsijan... bisa jadi tokoh carita anyar anu pikaresepeun.” — Ajip Rosidi
Citakan II, 2003; 11,5 x 17,5 cm.; 86 kaca; Rp 15.500,-

SEUNEU NARAKA

2007-01-10T00:29:00.000-08:00

Tilu Carita Jepang
Disundakeun ku Tini Kartini
Carpon “Seuneu Naraka” karya Akutagawa Ryunosuké, ngagambarkeun kumaha Yoshihidé, pelukis istana Otono Sama nu mashur tapi kacida “ékséntrik” téga pisan ngorbankeun anak awéwéna nu ngan hiji-hijina jadi modél lukisan nu dijudulan “Seuneu Naraka”. Manéhna hayang ngagambarkeun sacara “réalistis” kaayaan jalma-jalma nu nandangan siksa naraka.
Salian ti “Seuneu Naraka”, Tini Kartini ogé narjamahkeun dua carpon lianna: “Tukang Suling jeung Kaisarna” karya Yoshikawa Éiji jeung “Jalma Buangan” karya Mori Ogai.
Citakan I, 2003; 14,5 x 21 cm.; 88 kaca; ISBN 979-3631-51-1; Rp 17.500,-

SAIJA

2007-01-10T00:28:00.000-08:00

Multatuli; Disundakeun jeung Dipanganteuran ku R.T.A. Sunarya
Karya Multatuli anu di judulan Max Havelaar ngagambarkeun kaayaan di Banten Kidul jaman harita: ra’yat désa dikaniaya, diperdaya nu pohara ku pihak pamaréntah, akibat tina pulitik jajahan. Nya dina éta roman aya nyelap lalakon tragis Saija jeung Ina, nu henteu nepi ka cacap silihpikacinta ku lantaran jadi korban pulitik jajahan téa.
Ku R.T.A. Sunarya, nu baheula kungsi jadi bupati di tatar Sunda, dina ieu buku éta lalakon téh ditarjamahkeun. Henteu disalin saceplakna sakecap-sakecap, tapi éstuning disundakeun.
Citakan II, 2003; 14,5 x 21 cm.; 64 kaca; Rp 13.000,-

PANGANTéN

2007-01-10T00:26:00.000-08:00

Dédén Abdul Aziz
(Dilélér Hadiah Rancagé 2004)
Pangantén ngadongéngkeun krisis jiwa nu karandapan ku kaom rumaja. Dédén téh ngasongkeun surah nu mandiri kana naon rupa nu patali jeung jodo, pati, bagja reujeung cilaka. Kalawan miang tina jihat sawangan rumaja, ieu roman mawa warna basa nu mandiri deuih.
Dina ieu roman urang tepung jeung Rinrin minangka tokoh utamana. Kabogohna, Iyang alias Gumilang, maot nelasan manéh sanggeus nyebutkeun hayang kawin teuing ka saha. Leungiteun ku Iyang, terus layeut jeung Bén, tapi teu lana. Terus dalit jeung Suminar, dalah terus jadi lésbian. Tapi Suminar gé maot ku lantaran aborsi. Dina pamustunganana Rinrin gé hayang kawin teuing ka saha. Nu sidik, sanggeus Rinrin nelasan manéh, manéhna ngarasa geus laksana papanganténan.
Cit. I, 2003; 11,5 x 17,5 cm.; 108 kaca; Rp 17.500,-

PAGUNEMAN JEUNG FIR’AON

2007-01-10T00:25:00.000-08:00

Usép Romli H.M.
Siga kumaha ari mumi Fir'aon? Bisa jadi pikasieuneun, kongkolak panonna bolongor. Tapi dina hiji peuting mah, jasad Fir'aon téh nguniang. Di Museum Kairo, dina peuting nu keur meujeuhna jempling. Lain saukur cengkat deuih, da terus ngajak paguneman ka hiji wartawan nu ngaranna Erom Sumarom. Naon baé anu jadi bahan wangkongan Erom jeung Fir'aon téh?
“Paguneman jeung Fir'aon” téh salah sahiji carpon anu dimuat dina ieu buku. Geus hamo bireuk deui, karangan-karangan Usép Romli réa nyokot téma agama (Islam).
Citakan I, 2003; 14,5 x 21 cm.; 124 kaca; Rp 24.000,-

NYUKCRUK SAJARAH PAKUAN PAJAJARAN JEUNG PRABU SILIWANGI

2007-01-10T00:18:00.000-08:00

Drs. Saléh Danasasmita; Panganteur: Prof. Dr. édi S. ékadjati
(Dilélér Hadiah LBSS 2004)
Langka ahli sajarah urang Sunda tur nulis dina basa Sunda téh. Salasaurangna nya almarhum Saléh Danasasmita. Pedaranana ngeunaan sajarah Sunda anu pohara pentingna réa dimuat dina majalah Sunda antara taun 1960-1970-an. Gédéngeun éta, pedaranana nu ilmiah teu matak ngawagu anu maca, lantaran basana tetep komunikatif.
“Dina unggal artikel Kang Saléh satékah polah ngajawab pertanyaan anu muncul di masarakat ngeunaan rupa-rupa hal anu pakait jeung sajarah Karajaan Sunda...” — Prof. Dr. édi S. ékadjati
Citakan I, 2003; 14,5 x 21 cm.; 148 kaca; Rp 29.000,-

NYI HAJI SAONAH

2007-01-10T00:15:00.000-08:00

Sjarif Amin
Nyi Haji Saonah ngadongéngkeun pangalaman si kuring nu aya pikir kadua leutik ka hiji wanoja, tapi teu nepi ka kabiruyungan hirup babarengan. Kilang kitu ari duriat mah teu nepi ka pegat. Nya lebah dinya pisan naon nu dicaritakeun ku Sjarif Amin téh éstu nodél mamaras rasa...
Cék pangrasa, Nyi Haji Saonah mah aya punjulna. Najan nu ieu gé teu kaasup roman nu gandéng, tapi aya kasang sajarahna. Kagambarkeun, upamana baé, sakumaha riweuhna jaman dar dér dor di pilemburan alatan digalaksak ku gorombolan.... — Hawé Setiawan
Cit. I, 2003; 14,5 x 21 cm.; 100 kaca; ISBN 979-3631-59-7; Rp 17.500,-

NU TAREUNEUNG: CARITA PAHLAWAN ISLAM

2007-01-10T00:13:00.000-08:00

Ki Umbara
Nu Tareuneung téh midangkeun carita-carita taréh. Tangtuna gé sumberna tina taréh Islam nu dipikawanoh ku balaréa, nu sok dicaritakeun dina khutbah atawa dimuat dina buku jeung majalah. Ku Ki Umbara diraéh deui dina basa Sunda. Henteu ngageblég jiga carita sajarah. Ieu mah sempalanana anu bisa dibaca misah-misah. Nu dicaritakeun téh kateuneung para sahabat Nabi dina enggoning ngabéla jeung ngadegkeun komara Islam.
Alus jeung bacaeun barudak. Jang kolot gé gedé mangpaatna.
Citakan III, 2006; 14,5 x 21 cm.; 76 kaca; ISBN 979-3631-5-9; Rp 15.500,-

MAPAG PERANG BARATA

2007-01-10T00:10:00.000-08:00

Ahmad Bakri
Salah sahiji bagian nu penting dina Mahabharata téh nyaéta basa Dorna mapatahan murid-muridna (Kurawa jeung Pandawa) ngécéng manuk. Murid nu séjén nyaritakeun naon nu katénjo ku maranéhna waktu keur ngécéng, salian ti hulu manuk anu kudu dipanah. Ngan Arjuna mah séjén deui téténjoanana téh. Manéhna ukur nénjo hulu manuk wungkul, henteu nénjo deui nu séjénna.…
Ku katapisanana dina nulis, Ahmad Bakri bisa masieup Mapag Perang Barata jadi bacaan nu pikaresepeun. Témpona gancang, henteu aya bagian nu ngulibek matak bosen atawa kaleuleuwihi dina nyaritakeun hiji hal.
Citakan I, 2003; 14,5 x 21 cm.; 62 kaca; Rp 12.500,-

LAGU HUJAN SILANTANG

2007-01-10T00:08:00.000-08:00

étti R.S.
Aya sawidak sajak dina buku kumpulan sajak étti R.S. panganyarna. Cara nu geus jadi ciri mandiri sajak-sajak étti, réa sajak anu nuduhkeun katabah nu nyajak enggoning ngaji diri, neuleuman kersaning Pangéran, bari inget kana pangbalikan. Sawatara sajak lianna ngedalkeun katresna ka sarakan, dibarung ku kasadaran kana sajarahna, Aya deuih sajakna nu rada sindir-sampir, ngaheuheuykeun paripolah jalma di alam dunya.
Citakan I, 2003; 14,5 x 21 cm.; 76 kaca; Rp 15.000,-

JURIG PASÉA JEUNG NYI KARSIH

2007-01-08T03:11:00.000-08:00

Tini Kartini
Réa karangan dina ieu buku anu ngadongéngkeun hal perkara kaum wanoja. Paling copélna gé karanganana réa anu miang tina jihat sawangan (point of view) wanoja. Awéwé nu ngalalakon karéréana ngarandapan pangalaman anu teu pikabungaheun.
Dina kurung-karangna Téh Tini mah henteu ngan ngumbar imajinasi. Imajinasina téh dipageuhan ku kasadaran anu jembar kana sajarah masarakatna katut tilikan anu seukeut kana kaayaan hirup kumbuh di sakuriling dirina. — Hawé Setiawan Citakan I, 2003; 14,5 x 21 cm.; 148 kaca; Rp 29.000,-

JURIG GEDONG SETAN

2007-01-08T03:08:00.000-08:00

Ki Umbara
Wildan, mahasiswa “miskin” ti Cirebon, nyicingan imah nu réa jurigan. Basa ngamimitian nyicingan éta imah, pabebeurang aya awéwé beunghar umur lima puluh taunan, hayang maturan manéhna cicing di dinya. “Tumut kana pituduh nu gaib,” cénah. Kumaha polah Wildan jeung Si Ema nyanghareupan para ponggawa jurig? Naha terus dirogahala?
Réréana carpon dina ieu buku nyaritakeun jurig cara nu hirup dina alam pikiran urang Sunda, kalawan gaya carita nu pikaresepeun saréréa, kaasup... jurigna boa.
Citakan I, 2003; 14,5 x 21 cm.; 100 kaca; Rp 20.000,-

éLMU POLITIK KEUR WARGA NU

2007-01-08T03:04:00.000-08:00

H. Enas Mabarti; Panganteur: H. Usép Romli H.M.
Dilélér Hadiah LBSS 2004
Réréana perkara nu dipedar dina ieu buku sumberna tina bab adab-adaban politik dina kitab Adabud Dunya wad-Din nu ngaguar yén politik téh baris ngadatangkeun mangpaat ka balaréa upama nyoko dina genep dasar: nempatkeun agama (Islam) pikeun anutan, pamaréntah nu kuat, kaadilan nu rata tur nyaliara, kaamanan nu karasa nangtayungan saréréa, ceuyah sandang pangan, jeung mangsa pikahareupeun nu jelas.
Enas Mabarti geus méré sumbangan nu gedé ajénna pikeun kamekaran jeung kahirupan basa Sunda hususna, umumna keur kapentingan pangaweruh masyarakat nu merelukeun panuyun ngeunaan élmu politik.
Citakan I, 2003; 14,5 x 21 cm.; 124 kaca; Rp 15.000,-

LUTUNG LEUTIK

2007-01-04T20:15:00.000-08:00

Ki Umbara
Ieu mah lalakon Ratu Bungsu Karma Jaya jeung Ratu Emas Bagandan Sari. Nu kasép jeung nu geulis. Nu kasép ti Pajajaran, ari nu geulis ti Cihanjuang. Patepungna di hulu dayeuh Margacina basa duanana katalangsara.
Karma Jaya jeung Bagandan Sari kudu nyorang rupa-rupa tanjakan saméméh tinemu bagja di Nagara Margacina téh.
Kitu leuwih kurangna mah nu didongéngkeun ku Ki Umbara téh , dumasar kana carita pantun nu populér di Kuningan.
Citakan I, 2002; 14,5 x 21 cm.; 72 kaca; Rp 16.000,-

KABANDANG KU KUDA LUMPING

2007-01-04T20:12:00.000-08:00

Ahmad Bakri
Nu kabandang ku kuda lumping téh Jang Udin. Manéhna keur meujeuhna resep ulin, jarambah, tara nurut kana papatah kolot. Élodan deuih, nu matak basa dititah ku emana nyokot duit ti tatanggana, manéhna kabandang ku jalma réa nu ngabring ngiringkeun kuda lumping. Sabot nutur-nutur kuda lumping, duitna leungit. Mangkaning lain saeutik-eutik duit. Ladang paré kitu atuh. Rék balik sieun dicarékan kolot, babakuna mah sieun diasupkeun ka pangbérokan. Da cék bapana, budak bangor mah sok dikerem di Tangerang. Antukna Jang Udin minggat nutur-nutur jalma saliwat, leumpang sakaparan-paran, datang ka balangsak di lembur batur.
Citakan II, 2002; 11,5 x 17,5 cm.; 72 kaca; Rp 16.000,-

JATINING SOBAT

2007-01-04T20:10:00.000-08:00

Samsoedi
Jatining Sobat ngalalakonkeun pangalaman Minta, anu hirupna balangsak sanggeus bapana kabéjakeun maot di pangbérokan, ari indungna lunta teu puguh raratanana. Kapaksa manéhna kudu cicing di emangna, tapi teu betaheun, lantaran emangna téh gegedug bangsat. Ahirna ieu budak téh minggat ti imah emangna.
Minta jonghok jeung sobatna. Sobatna gé hirupna balangsak, ngan waé manéhna mah geus boga karep ihtiar sorangan kana dagang. Minta gé nurutan, diajar dagang di Tegallega.
Enya, éta gé aya ari nu pikabungaheun mah, nyaéta basa Minta meunang lotré saratus rupia. Tapi éta emangna, angger baé nyieun pangririwa. Malahan mah Minta rék diarah pati ku emangna téh.
Citakan II, 2002; 14,5 x 21 cm.; 92 kaca; Rp 18.500,-

CARITA SI DIRUN

2007-01-04T20:08:00.000-08:00

Samsoedi
Si Dirun téh budak bengal, teu nurut ka kolot. Hiji poé Si Dirun susumpit ka sawah bet kamalinaan, nepi ka poho balik. Indungna néangan, cul seuneu di hawu. Gur téh umah Si Dirun kahuruan. Ambu Dirun maot kaléntab seuneu.
Saprak indungna maot, Si Dirun cicing jeung uwana anu pohara meditna. Si Dirun ukur dititah ngangon munding, daharna mah henteu dipaliré. Hiji poé Si Dirun kasaréan di saung ranggon. Barang lilir hujan gedé naker, walungan Citarum limpas. Si Dirun nyieun rakit tina tangkal cau, tapi kabawa palid. Isukna, Si Dirun geus aya di tengah laut....
Citakan II, 2002; 14,5 x 21 cm.; 64 kaca; Rp 13.000,-

BUDAK TEUNEUNG

2007-01-04T20:04:00.000-08:00

Samsoedi
Kahirupan Warji, budak yatim umur sawelas tahun, kacida balangsakna, katurug-turug deuih ku barudak papantaranana remen dijailan, pangpangna ku Si Begu jeung Si Utun.
Dina hiji poé, Warji nulungan anak lurah anu tigebrus ka sumur burung di kebon awi. Ti kajadian harita, anak lurah téh jadi malik nyaah ka Warji. Ku Pa Lurah, manéhna dijeujeuhkeun jadi tukang ngangon munding. Ari peutingna, Warji sok diajar maca jeung nulis ka Asép Onon.
Ari Si Begu jeung Utun mah beuki teu eucreug, tepi ka ahirna jadi bangsat gerot. Basa Si Begu jeung Utun keur babagi duit hasil ngarampog, kaperego ku Warji.
Cit. V, 2002; 14,5 x 21 cm.; 56 kaca; ISBN 979-3631-73-2; Rp 14.000,-

TI PULPéN TEPI KA PAJARATAN CINTA

2007-01-04T20:02:00.000-08:00

Kumpulan Carpon Mini Sunda
Aya tilu puluh carpon mini anu kapidangkeun dina ieu buku. Kabéhanana hasil Saémbara Ngarang Carpon Mini Sunda nu diayakeun ku Lembaga Kebudayaan Mekar Parahyangan jeung Klub Pecinta Sastra (KPS) Bandung, minangka karangan-karangan petingan. Méh kabéh karya pangarang entragan anyar. Ku kituna karangan-karangan nu aya dina Ti Pulpén tepi ka Pajaratan Cinta téh lain baé geus ngabeungharan sastra Sunda, tapi ogé geus nuduhkeun yén lalakon sastra Sunda téh katingalina panjang kénéh.
Citakan I, 2002; 14,5 x 21 cm.; 124 kaca; Rp 15.000,-

SRIPANGGUNG

2007-01-04T19:59:00.000-08:00

Tjaraka
Kahirupan masarakat di kontrakan entéh tacan loba diungkab dina sastra Sunda, padahal éta téh hiji kanyataan dina kahirupan urang Sunda.
Sripanggung beunangna Tjaraka kaasup karya sastra Sunda anu ngungkab hal éta. Katara onjoyna ieu roman mun dibandingkeung jeung karya-karya liana anu nyokot kasang tukang kahirupan di kontrakan entéh. Lain baé ku lantaran ajén sastrana leuwih unggul, tapi deuih gambaran kahirupan sapopoé masarakat kontrakan anu dicaritakeun ku pangarang karasa leuwih ébréh jeung leuwih realistik.
Citakan III, 2002; 14,5 x 21 cm.; 154 kaca; Rp 25.000,-

SI KABAYAN JADI DUKUN

2007-01-04T19:57:00.000-08:00

Moh. Ambri
Jadi dukun soténan kapaksa Si Kabayan mah. Saikem, pamajikanana, nu sasat jadi cukang lantaranna mah. Manéhna hayang males kanyeri ka salaki pédah kungsi ditampiling. Basa kadatangan sémah nu néangan dukun lepus, Saikem nyebutkeun yén Si Kabayan téh dukun anu kamatihanana moal aya bangsana. Ngan cenah ku lantaran jalma mahiwal, Si Kabayan tara daék ngaku jadi dukun kajaba mun ditampilingan heula.
Tah, kumaha ari geus kitu? Sok sanajan rangkayna meunang mindahkeun tina naskah drama Le Medecin Malgre Lui karya Moliére, ieu novél karya Moh. Ambri téh teu wudu karasa nyundana.
Citakan IV, 2002; 14,5 x 21 cm.; 72 kaca; Rp 17.500,-

MéNAK AMIR

2007-01-04T19:55:00.000-08:00

Ki Umbara
Maha Raja Arab jujuluk Ménak Amir, anu kakoncara ageung komara keras ngajaga kahormatan agama, kagungan putra pameget anu kakasihna mashur Radén Iman Suwangsa Repat Maja. Dina hiji mangsa, Radén Putra dipitnah ku éyangna. Atuh Radén Putra téh ditundung ku ingkang rama, dipiwarang kaluar ti nagara. Diréncangan ku uwana jenengan Umar Madi, Radén Putra turun gunung unggah gunung, nyorang leuweung geledegan, nandangan kasesah....
Kitu di antarana nu didongéngkeun ku Ki Umbara dina ieu carita dumasar kana siklus carita kawentar anu asalna ti Pérsia téa.
Citakan I, 2002; 14,5 x 21 cm.; 72 kaca; Rp 14.500,-

LALEUR BODAS

2007-01-04T19:53:00.000-08:00

Samsu
Basri hahadéan jeung Lili. Dina hiji peuting waktu keur nariis di Haur Duni, maranéhna bet merego Didi nyieun lampah teu uni jeung Sumarni. Didi terus ngunek-ngunek, hayang nyilakakeun Basri.
Basri haben diganggu maké rupa-rupa jalan. Sajeroning kitu, Basri sok remen narima surat pondok ti “Laleur Bodas”, tepi ka manéhna remen salamet tina laku jahat panggawé deungeun. Saha ari “Laleur Bodas” téh?
“Laleur Bodas téh caritana basajan, henteu pabeulit cara ilaharna carita mistéri, tapi henteu weléh ngahudang kapanasaran anu maracana. Pangarangna tapis pisan dina ngarasiahkeun saha saenyana “Laleur Bodas” téh” — Ajip Rosidi
Citakan I, 2002; 14,5 x 21 cm.; 188 kaca; Rp 20.000,-

KEMBANG-KEMBANG PETINGAN

2007-01-04T19:50:00.000-08:00

Holisoh M.é
Dilélér Hadiah Rancagé 2003
Nu didongéngkeun dina buku ieu téh urut awéwé bangor. Ari pangna kungsi jadi ungkluk pédah salakina kawin deui ka ungkluk. Tepung jeung lalaki ngaran Handi, “langgananana” baheula. Terus kawin dijadikeun pamajikan anu kadua, minangka jalan sangkan jadi jelema bener. Ngan hanjakal, lingkunganana anu anyar henteu narima aya urut ungkluk di dinya.
“Holisoh geus hasil ngagambarkeun sapotong kahirupan anu ngajak nu macana leuwih ngama’lum kana kahirupan batin jelema-jelema anu disebut runtah atawa rereged masarakat.” — Ajip Rosidi
Citakan I, 2002; 14,5 x 21 cm.; 188 kaca; Rp 35.000,-

JODO PAKOKOLOT

2007-01-04T19:48:00.000-08:00

Méméd Sastrahadiprawira
Lalakon Radén Suria Sungkawa sareng Endén Ratna Wulan anu didongéngkeun ku Méméd Sastrahadiprawira (1897-1932) dina Jodo Pakokolot téh. Lalakon panglipur, minangka raéhan tina Il Decameron, salah sahiji karya utama Abad Pertengahan, yasana Giovanni Boccaccio anu kawentar. Ku tiasa Méméd nyundakeunana, mindahkeun kasang ti Éropah ka lembur urang, nepi ka karasana merenah, luyu jeung acining batin balaréa Sunda.
Citakan II, 2002; 14,5 x 21 cm.; 60 kaca; Rp 12.000,-

DUKUN LEPUS

2007-01-04T19:45:00.000-08:00

Ahmad Bakri
Dina karangan-karanganana anu dimuat dina ieu buku, katangén pisan yén Ahmad Bakri lain waé ngan saukur wanoh, tapi deuih dalit kana kahirupan urang Sunda sapopoé dina rupa-rupa jaman—saluyu jeung anu karandapan ku dirina, anu ngalaman hirup ti mimiti “jaman normal” tepi ka ahir taun ‘80-an. Nya hal éta pisan anu ngalantarankeun Ahmad Bakri tapis ngagambarkeun rupa-rupa suasana katut karakter tokoh-tokohna.
Ieu buku kumpulan carpon mangrupa salasahiji mutiara titinggal Ahmad Bakri, anu kungsi meunang jujuluk pangarang Sunda favorit.
Citakan I, 2002; 14,5 x 21 cm; 144 kaca; Rp 16.000,-

DINA KALANGKANG PANJARA

2007-01-04T19:43:00.000-08:00

Jeung Tilu Carita Lianna
Ahmad Bakri
Geus teu matak bireuk, kumaha ari gaya Ahmad Bakri dina karangan-karanganana. Lain waé dina lebah tapisna nyusun ungkara, tepi ka carita téh enya-enya karasa hirup, tapi deuih sacara téknis matak nimbulkeun kapanasaran anu macana; asa lebar lamun tepi ka teu tutug nuturkeunana téh. Opat carita anu dikumpulkeun dina ieu buku kaasup karya petingan Ahmad Bakri anu milu ngabeungharan sastra Sunda.
Citakan I, 2002; 14,5 x 21 cm; 144 kaca; Rp 25.000,-

BéBéR LAYAR

2007-01-04T19:42:00.000-08:00

Ajip Rosidi
Ieu buku eusina dua welas karangan nu tadina mah bacacar di sawatara surat kabar jeung rohangan seminar. Disusun sarta diumumkeun ku Ajip Rosidi dina taun-taun 1950-an nepi ka 1960-an, mangsa ieu pangarang keur “dedegler” kénéh. Karanganana remen karasana peureus, togmol, tapi tetep rasional sarta proporsional. Demi anu jadi jejerna taya lian iwal ti pirang-pirang perkara penting di sabudeureun sastra Sunda sabada perang. Ajén ieu buku babakuna patali jeung tarékah Ajip enggoning ngabaladah tradisi kritik sastra Sunda, ku jalan nandeskeun sarta ngélingan réhing sastra Sunda geus wayahna kudu miboga “dasar-dasar kasadaran anu leuwih tohaga”, sabab cenah “jaman nyastra sasambian atawa jaman sasastraan geus kudu ditinggalkeun”.
Citakan III, 2002; 14,5 x 21 cm; 144 kaca; Rp 22.000,-

CARITA SARéBU SAMALEM

2007-01-04T19:34:00.000-08:00

Carita Sarébu Samalem téh tangtuna gé ti ditu, ti Tanah Arab, anu disebut Alf Layla wa Layla atawa nu cék bangsa Inggris téa mah Arabian Nights. Ngocorna ka lembur urang, nepi ka milu ngabeungharan sastra Sunda, éta téh hasil gawé rancagé Mohamad Ambri jeung Méméd Sastrahadiprawira, pangarang Sunda anu kawentar téa. Ieu carita klasik anu kamashur téh disaluyukeun jeung jatining batin urang Sunda, pangpangna mah basa wawacan masih kénéh dipikaresep ku balaréa, nepi ka genah dibacana.
ANIS ALJALIS
Méméd Sastrahadiprawira
Citakan I, 2002; 14,5 x 21 cm.; 52 kaca; Rp 15.500,-
BUAH KOLDI
Moh. Ambri
Citakan I, 2002; 14,5 x 21 cm.; 68 kaca; Rp 15.500,-
ISTRI PELIT
Moh. Ambri
Citakan I, 2002; 14,5 x 21 cm.; 68 kaca; Rp 15.500,-
LALAKON SAéPULMULUK
Moh. Ambri
Citakan I, 2002; 14,5 x 21 cm.; 72 kaca; Rp 16.500,-
PALIKA JEUNG JIN
Moh. Ambri
Citakan I, 2002; 14,5 x 21 cm.; 68 kaca; Rp 15.500,-

ANAKING JIMAT AWAKING

2007-01-04T19:31:00.000-08:00

Wahyu Wibisana
Anaking Jimat Awaking midangkeun runtuyan karangan beunang Wahyu Wibisana anu jejerna museur kana tingkah paripolah barudak. Nu kapidangkeun téh kawas albeum poto nu ngagambarkeun kahirupan sapopoé hiji kulawarga. Kawantu nu ngarangna kasebut panyajak lirik, tur nu disawangna téh anakna pisan, puguh baé karanganana jadi ngagalindeng lir lagu nu metot ka jero kalbu. Nu ngarang kawas ngajak ngeunteung bari ngimpleng. Aoseun sugri nu mikacinta sastra Sunda enggoning nilik diri nyeukeutan kasurti.
“Wahyu mah kacirina resep nilik dirina pribadi katut jagat leutik di sakurilingna, anu kongkrit tur ngajanggélék dina kahirupan sapopoé.... — Hawé Setiawan Citakan I, 2002; 14,5 x 21 cm; 72 kaca; Rp 16.500,-

MANéHNA

2007-01-04T19:29:00.000-08:00

Sjarif Amin
Manéhna, mojang anu teu wasa nuturkeun pangjurung kalbu, lantaran katalian ku pangrérémo kolot, ahirna kapaksa kudu papisah jeung jajaka anu dipikacintana. Demi si jajaka, sanggeus kaleungitan mojang anu jadi panyileukanana, kudu panjang nandangan lara.
Katineung dina mangsa ka tukang-tukang henteu bisa disieuhkeun, ngukuntit ka mana waé indit. Dina keur pareng malikan deui lalampahan bari nyoréang ka mangsa lawas, bet karasa aya nu leungit, lantaran sidik, si mojang geus aya nu ngiwat. Tapi, leungit téh raga badagna, da ari lelembutanana mah anteng manteng dina geter angen.
Citakan III, 2001; 14,5 x 21 cm.; 74 kaca; Rp 15.000,-

LEMBUR SINGKUR

2007-01-04T19:27:00.000-08:00

Roman Pondok Abdullah Mustappa
Lalakon kapeurih jeung kasedih, jaman pasisian Tatar Sunda ririweuhan alatan mahabuna gorombolan. Kulawarga paburantak, alatan nu jadi bapa biluk ka gunung, ninggalkeun anak-pamajikan anu antukna jadi paneumbleuhan kaceuceub. Tug dina hiji mangsa, gorombolan tarurun ngajorag lembur, anu geus tangtu balaréa anu katalangsarana. Tokoh kuring, hiji budak lalaki anu ditinggalkeun ka gunung ku bapana, kudu ngalaman nyaksian indung katut dua lanceukna milu kabarérang, waktu lembur singkur dilemahirengkeun ku gorombolan. Sabab, kitu ceuk anggapan tentara, peristiwa dijoragna éta lembur téh aya patalina jeung bapana téa.
Citakan II, 2001; 11,5 x 18 cm.; 60 kaca; Rp 12.000,-

GALURING GENDING

2007-01-04T19:24:00.000-08:00

Tatang Sumarsono
(Dilélér Hadiah Rancagé 2002)
“Dina Galuring Gending karya Tatang Sumarsono, katangén yén pangarang ieu novel téh ancrub kana kahirupan. Gagasan anu diangkat tina kahirupan aktual téh diolah ku parabot novel, terus disusun dina hiji pidangan novel anu karasa nyari. Katangén aya studi antropologis jeung sosiologis anu dilakukeun ku pangarang.” — Saini K.M.
Novel anu dilélér Hadiah Sastra D.K. Ardiwinata ti Paguyuban Pasundan, 1999, jeung Hadiah Sastra Rancagé ti Yayasan Rancagé, 2002.
Citakan I, 2001; 14,5 x 21 cm.; 336 kaca; Rp 50.000,-

FIQIH IBADAH BASA SUNDA

2007-01-04T19:21:00.000-08:00

Muh. Syarief Sukandi
Urusan fiqih, utamana fiqih ibadah, kacida pentingna dina kahirupan, sabab raket patalina jeung kasalametan urang, pangpangna jaga di ahérat. Ku sabab kitu, éta urusan téh kudu enya-enya dipikaweruh ku sakumna umat Islam, sangkan amal ibadah urang luyu jeung papagon katut conto Kangjeng Rosul saw.
Almarhum Ustad Muh. Syarief Sukandi ngadadarkeun urusan ibadah kalawan jéntré. Pedaranana sarwa ringkes tur dijugjug perluna baé, malar babari kahartina. Sakur babagian anu dipedarna salawasna diwuwuhan ku dalil anu dicutat tina al-Qur’an reujeung Hadis, malar anu maracana teu ngarasa mangmang.
Citakan XIII, 2001; 14,5 x 21 cm.; 164 kaca; Rp 32.000,-

KAMUS POPULER BERGAMBAR SUNDA-INDONESIA

2007-01-04T19:18:00.000-08:00

Tatang Sumarsono
Kamus ini ditujukan kepada mereka yang belajar bahasa Sunda melalui bahasa Indonesia. Sesuai dengan fungsi kamus, materi yang disajikan meliputi padanan atau keterangan kata, baik yang masih berupa kata asal maupun kata jadian. Selain itu, juga idiom-idiom yang dibentuk dengan kata yang bersangkutan.
Setiap kata kepala beserta padanan atau keterangannya disajikan secara mudah dan sederhana, serta pada beberapa bagian dibantu dengan gambar.
Cetakan I, 2001; 11,5 x 17,5 cm; Tebal 320 halaman; Harga Rp 25.000,-

BUNTUT OA

2007-01-04T19:14:00.000-08:00

Kumpulan Guguyon Ki Cakakak
Ari oa buntutan? Puguh waé ceuk Jang Ardi mah. Lamun aya nu nyebut teu buntutan, ah, kajeun gelut wé! Séjén deui pangalaman Pa Niti waktu ulin ka kebon binatang jeung pamajikanana. Manéhna manggihan endog gajah. Gancang waé dibawa ka imah, terus disileungleuman ku Pa Niti. Megar? Is, atuh puguh. Barang dirampa ku pamajikanana, bet kakeupeul tulaléna. Réa kénéh guguyon séjénna. Tangtu waé matak akey-akeyan, tepi ka nyeri kulit seuri balas beubeuteungan. Tapi, mun téa mah nu maca ieu buku teu nyenghél-nyenghél acan, jajauheun mun seuri babarakatakan, sim kuring teu tanggel waler dunya ahérat.
Citakan IV, 2001; 11 x 18 cm.; 88 kaca; Rp 17.500,-

UCANG-UCANG ANGGé

2007-01-02T19:08:00.000-08:00

Panineungan Ajip Rosidi
Lain waé kudu dideudeul data nu akurat, tapi deuih kudu panjang ingetan. Heueuh, mun urang aya karep nulis mémoar, boh ngeunaan peristiwa boh ngeunaan kahirupan sajumlahing tokoh; kawas anu dipidangkeun dina ieu buku. Hamo bisa mun ukur ngandelkeun data meunang ngalelebah mah, komo mun bari geus loba poho. Dina ieu buku hadir rupa-rupa tokoh baradag anu kungsi ngajungkiring dina jamanna, ditulis ngaliwatan panyawang Ajip Rosidi. Aya Dajat Hardjakusumah, Affandi, Doddy A. Tisnaamidjaja, Akil Prawiradiredja, H.B. Jassin, jeung sawatara tokoh lianna. Mémang, anu diébréhkeun di dieu téh henteu sagemblengna tina lalakon hirup anu karandapan ku éta para tokoh, tapi bagian-bagian penting anu bisa jadi can loba kaungkab.
Citakan I, 2001; 14,5 x 21 cm; 260 kaca; Rp 40.000,-

HURIP WARAS!

2007-01-02T19:05:00.000-08:00

Dua Panineungan
Ajip Rosidi
“Bari ngulik sastra, katémbong Kang Ajip nuturkeun jeung ngabandingkeun kahirupan masarakat sabudeureunana, kaasup kahirupan jeung masalah bangsa katut nagarana. Dina umur 18 taun Kang Ajip geus milu mikiran nasib masarakat jeung lemah caina anu keur nyanghareupan rupa-rupa masalah anu pakuat-pakait jeung kahirupan kamasarakatan, kabudayaan, jeung kanagaraan.”— Édi S. Ékadjati
Citakan II, 2001; 14,5 x 21 cm; 248 kaca; Rp 37.500,-